Жаңа қоғамдық этика қалай орнығады: Елордадағы жиында қандай өткір мәселелер көтерілді

Бүгін Астанадағы Ұлттық академиялық кітапханада «Egemen Qazaqstan» газетінің «Санаткер ұлт» жобасы аясында маңызды басқосу өтті. «Жаңа қоғамдық сана: әдеп, тәртіп, жауапкершілік» атты дөңгелек үстелде еліміздегі жаңа қоғамдық этика мен жаңа құндылықтарды орнықтыру мәселелері қызу талқыланды. Жиынға белгілі мемлекет және қоғам қайраткерлері, депутаттар мен зиялы қауым өкілдері қатысып, өткір ойлар мен өзекті ұсыныстарын ортаға салды.

Жиынды тізгіндеген Президент кеңесшісі Бауыржан Омарұлы Мемлекет басшысы Қасым-Жомарт Тоқаевтың Түркістандағы жиында жүктеген міндеттерін еске салып, жаңа тұрпатты мемлекет құру жолында қоғамдық сананы жаңғырту аса маңызды екенін атап өтті. Оның айтуынша, елімізде ел бірлігі, тұрақтылық, әділдік, заң мен тәртіп, сенім мен жауапкершілік сияқты құндылықтар үстемдік құруы тиіс.

Басқосу барысында қатысушылар «Заң мен тәртіп» қағидатының қоғамдағы рөлі, жастар тәрбиесінің өзекті тұстары, «Таза Қазақстан» экологиялық идеясының мәні мен бүгінгі цифрлық дәуірдегі қарым-қатынас мәдениеті секілді көкейкесті тақырыптарды жан-жақты сөз етті. Зиялы қауым өкілдері жаңа этиканы қалыптастыру тек құжат жүзінде емес, әрбір азаматтың санасы мен күнделікті өмір салтында көрініс табуы қажеттігін жеткізді. Бұл бағыттағы толыққанды ақпарат пен сараптамалық пікірлерді «Egemen Qazaqstan» газетінің бүгінгі нөмірінен оқуға болады.