Демалыс күндері Қазақстанның қай өңірінде қар жауып, қай аймағында күн жылынады?

Қазақстанда алдағы демалыс күндері ауа райы құбылмалы болады. Елдің бірқатар өңірінде жаңбыр мен қар жауып, көктайғақ болуы мүмкін. Ал оңтүстік аймақтарда күндіз ауа температурасы 15 градусқа дейін көтеріледі, деп хабарлады «Қазгидромет».

Синоптиктердің болжамынша, 15 қарашада еліміздің батысында қатты жаңбыр жауады. Ал 16 қарашада Батыс Қазақстан облысында жаңбыр мен қар аралас жауын-шашын күшейеді.

Елдің әр өңірінде жел күшейіп, көктайғақ болуы ықтимал. Түнде және таңертең тұман түседі. Тек Қызылорда облысында жауын-шашынсыз ауа райы күтіледі.

Батыс және солтүстік өңірлер

Еліміздің батысында түнгі ауа температурасы алдымен 2–8 градус жылыдан 6–11 градус жылыға дейін көтеріліп, 16 қарашада 2 градус аяз бен 3 градус жылу аралығына дейін төмендейді. Күндіз 8–13 градус жылудан 1–8 градус жылуға дейін салқындайды.

Оңтүстік-батыста түнде 4–9 градус жылудан 0–5 градус жылуға дейін, күндіз 10–15 градустан 5–10 градусқа дейін төмендейді.

Солтүстік-батыста түнде 3 градус аяз бен 3 градус жылу аралығында болады. Күндіз ауа температурасы 2–9 градустан 4–11 градус жылуға дейін көтеріледі.

Солтүстікте түнде 5 градус аяздан 2 градус жылуға дейін, күндіз 2 градус аяз бен 3 градус жылудан 0–5 градус жылуға дейін өзгереді.

Ал Павлодар облысында керісінше күн суытады. Түнде 3–8 градус аяз, күндіз 2 градус аяз бен 3 градус жылу аралығында болады.

Орталық және шығыс өңірлер

Орталық Қазақстанда түнде 2–10 градус аяз күтіледі. Күндіз ауа температурасы 3 градус аяз бен 5 градус жылу аралығында болады.

Шығыста түнгі температура 1–8 градус аяздан 6–13 градус аязға дейін төмендейді. Күндіз 5 градус аяз бен 3 градус жылу аралығында болады.

Оңтүстік және оңтүстік-шығыс өңірлер

Еліміздің оңтүстігінде түнде 5 градус аяз бен 3 градус жылу аралығында болады. Күндіз ауа температурасы 5–12 градустан 7–15 градус жылуға дейін көтеріледі.

Оңтүстік-шығыста түнде аяз күшейеді. Ауа температурасы 1–6 градус аяздан 5–10 градус аязға дейін төмендейді. Таулы аймақтарда 9–14 градус аяздан 13–18 градус аязға дейін суытады.

Күндіз оңтүстік-шығыста 2–10 градус жылудан 0–8 градус жылуға дейін төмендейді. Таулы жерлерде 1–6 градус аяздан 3–8 градус аязға дейін суытады.

Синоптиктер желдің күшеюі, тұман мен көктайғақ салдарынан жолдарда сақ болуға кеңес береді.