Абай облысындағы ең өзекті жол мәселесі түбегейлі шешімін тапты

Абай облысында республикалық маңызы бар «Қарағанды – Аягөз – Тарбағатай – Боғас» автомобиль жолының «Аягөз – Тарбағатай» учаскесі орташа жөндеуден өтіп, ресми түрде пайдалануға берілді.

Нысанның ашылу салтанатына Абай облысының әкімі Берік Уәли қатысып, тұрғындарды маңызды инфрақұрылымдық жобаның аяқталуымен құттықтады. Аймақ басшысы Мемлекет басшысы Қасым-Жомарт Тоқаевтың Қазақстан халқына Жолдауында көлік-логистикалық әлеуетті арттыру мен автожол инфрақұрылымын жаңғыртуға ерекше басымдық берілгенін атап өтті.

«Былтыр желтоқсан айында Тарбағатай ауылына жасаған жұмыс сапарымда тұрғындар осы жолдың жай-күйін көтерген болатын. Көлік министрлігі, «ҚазАвтоЖол» ұлттық компаниясы және облыс әкімдігінің бірлескен жүйелі жұмысының нәтижесінде халыққа берілген уәде орындалды. Бұған дейін екі сағат уақыт алатын «Аягөз – Тарбағатай» бағытын енді 40 минутта еңсеруге мүмкіндік туды. Бұл жол Тарбағатай, Ақсуат және Зайсан аудандарының тұрғындары қатынайтын негізгі көлік дәлізі болып табылады», – деді облыс әкімі Берік Уәли.

1978–1980 жылдары салынған аталған автожолдың Абай облысы аумағындағы жалпы ұзындығы 618 шақырымды құрайды. Өткен жылы оның 15 шақырымы жөнделсе, биыл 66 шақырымдық учаскесі толық жаңартылды.

Құрылыс-жөндеу жұмыстары аясында жол негізі нығайтылып, жаңа асфальтбетон жабыны төселді. Сонымен қатар жол жиектері ретке келтіріліп, су өткізу құрылыстары, қозғалыс қауіпсіздігі белгілері, аялдау алаңдары, жолаушылар павильондары және жарықтандыру жүйелері орнатылды.

Тарбағатай ауылының тұрғыны Ардақ Сіләмбаев жолдың жаңартылуы жолаушылар тасымалын жақсартып, ауылдық елді мекендердің әлеуметтік-экономикалық дамуына оң серпін беретінін жеткізді. Бұған дейін жол жабынының тозуына байланысты Ақсуат, Зайсан және Ақжар бағытындағы қоғамдық көліктер Жарма ауданы арқылы айналып жүруге мәжбүр болған.

Қазіргі уақытта Абай облысында жергілікті маңызы бар жолдарды жаңғырту жұмыстары да жалғасуда. Өңір бойынша жалпы ұзындығы 212,6 шақырым автожолда орташа жөндеу жүргізілуде. Оның ішінде облыстық маңызы бар үш учаскеде 41 шақырым, аудандық маңызы бар тоғыз учаскеде 91,4 шақырым жол және 20 елді мекендегі жалпы ұзындығы 80,2 шақырымды құрайтын 80 көше қамтылған.