ДЕПУТАТТЫҢ КӨМЕГІМЕН ЗЕЙНЕТКЕРДІҢ НЕСИЕ ТӨЛЕМІ АЗАЙТЫЛДЫ

Құрылтай депутаты Алмат Әбдікешовтің қоғамдық қабылдауына Ақмола облысы Целиноград ауданына қарасты Төңкеріс ауылының тұрғыны Файма Исина жүгінді. Зейнеткер несие төлеуде қиындыққа тап болғандықтан, банктен қарыз шарттарын қайта қарауға көмек сұраған.

Файма Исина сегіз жыл бұрын зейнеткерлікке шыққанымен, күнкөріс қамымен еңбек етіп келген. Осыдан 15 жылдан астам уақыт бұрын салған үйіне жөндеу жүргізу үшін 4 миллион теңге несие рәсімдеген. Алғашқы екі жылда ай сайын 163 мың теңге төлеп, міндеттемесін уақытылы орындаған.

Алайда үш ай бұрын денсаулығына байланысты жұмысын тоқтатуға мәжбүр болған. Содан бері оның жалғыз табыс көзі зейнетақысы болып қалған. Зейнетақы мөлшері 137 мың теңге болса, несие бойынша ай сайынғы төлем 162 мың теңгені құраған.

Зейнеткер банкке несие шарттарын қайта қарау туралы өтініш білдіргенімен, одан бас тартылғанын айтады. Оның сөзінше, банк зейнетақысын толықтай ұстап қалу және баспанасынан айырылу қаупі бар екенін ескерткен.

«Үйімді 16 жыл бұрын өз қолыммен тұрғыздым. Мен үшін оның орны бөлек, әр кірпіші ыстық. Несиені төлеуден бас тартқан емеспін. Тек денсаулығым сыр беріп, жұмыссыз қалған соң, жағдайымды ескеріп, жеңілдік жасауды сұрадым. Алайда алатын зейнетақым несие төлеміне жетпейді. Енді қайда барып, кімнен көмек сұрарымды білмей қалдым», – деді Файма Исина.

Өтінішті қараған депутат Алмат Әбдікешов банк өкілдерімен келіссөздер ұйымдастырып, нәтижесінде зейнеткердің әлеуметтік жағдайы мен төлем қабілеті ескеріле отырып, жаңа төлем кестесін бекіту жөнінде келісімге қол жеткізілді.

Атап айтқанда, ай сайынғы несие төлемін зейнетақысының 50 пайызы көлемінде белгілеу мәселесі келісілген. Бұған қоса, негізгі қарызға есептелген пайыздарды алып тастау жөніндегі өтініш те оң шешімін тапқан.

Осылайша, зейнеткердің несие жүктемесін жеңілдету және баспанасын сақтап қалу мәселесі бойынша келісім жасалды.

Айта кетейік, Құрылтай депутаттарының қоғамдық қабылдауында азаматтар өздерін толғандырған мәселелер бойынша өтініш білдіре алады. Биыл қыркүйек-қазан айларында депутаттар 400-ден астам азаматты жеке қабылдаған. Өтініштердің басым бөлігі баспана, жұмыспен қамту және әлеуметтік көмек көрсету мәселелеріне қатысты болған.