Қазақстан Өзбекстанға 500 киік бермек

Қазақстан мен Өзбекстан киіктердің санын көбейту және оларды қоныс аударту бағытында бірлесіп жұмыс істеу туралы меморандумға қол қойды. Бұл туралы Қазақстанның Экология және табиғи ресурстар министрлігі хабарлады.

Келісім аясында екі ел киіктердің көші-қон жолдарын қорғауға, браконьерлікпен күресуге және жануарлардың табиғи мекенін қалпына келтіруге күш біріктіреді. Сондай-ақ киіктердің саны мен денсаулығын бірлесіп бақылау, ғылыми мәліметтер алмасу, жерсерік арқылы қадағалау және ветеринариялық тексеру жұмыстары қарастырылған.

Бұған дейін Өзбекстанның Экология және климаттың өзгеруі жөніндегі ұлттық комитетінің төрағасы Азиз Абдухакимов Қазақстаннан шамамен 500 жас киікті Өзбекстанға көшіру жоспары бар екенін айтқан. Алайда әзірге жануарларды көшірудің нақты мерзімі жарияланған жоқ.

Өзбекстанда киік саны өте аз. Арал маңындағы Үстірт киіктерінің мекенінде бірнеше жүз ғана жануар қалған. Бұған киіктердің дәстүрлі көші-қон жолдарының бұзылуы әсер еткен. Енді екі мемлекет киіктерді бұрынғы мекеніне қайта жерсіндіру, жайылымдар мен су көздерін қалпына келтіру бағдарламасын әзірлемек.

Қазақстанда 2026 жылғы көктемгі санақ бойынша 4 миллион 689 мың киік тіркелген. Оның 2,7 миллионы Орал өңірінде, 1,87 миллионы Бетпақдалада, 119 мыңы Үстіртте мекендейді.

Үстірт киіктері бұрын Қазақстан мен Өзбекстан арасында еркін көшіп-қонып жүрген. Алайда шекарадағы қоршаулар мен жол құрылысы олардың қозғалысын қиындатып, Өзбекстандағы киік санының азаюына ықпал еткен.