155 миллион теңгеге жабдықталған орталық: ШҚО ауылындағы мәдениет үйі танымастай жаңарды

Шығыс Қазақстан облысының Үлкен Нарын ауданында «Қазақстан халқына» қоғамдық қорының демеушілігімен күрделі жаңғыртудан өткен мәдениет үйі салтанатты түрде ашылды. «QH Мәдени даму алаңы» жобасы аясында жүзеге асқан бұл бастама ауыл жастарына мегаполистердегідей заманауи шығармашылық ортада дамуға мүмкіндік бермек.

Жобаны іске асыруға қор тарапынан 155 миллион теңгеден астам қаражат жұмсалған. Оның 112 миллион теңгесі ғимараттың ішкі бөлігін жабдықтауға, ал 42 миллион теңгесі сыртқы аумағын абаттандыруға бағытталды. Сондай-ақ жергілікті бюджеттен бөлінген 50 миллион теңгеге аулаға ашық аспан астындағы сахна орнатылып, киіз үй мен алтыбақан қойылды.

Жаңартылған орталықта балалар мен жасөспірімдер үшін он арнайы бағыттағы бөлме ашылған:

• Дәстүрлі және заманауи өнер: вокал, домбыра, халық аспаптары, фольклорлық ансамбль және хореография залдары;

• Заманауи медиа және технология: кәсіби дыбыс жазу студиясы, фото және бейнемонтажға арналған медиастудия;

• Шығармашылық және демалыс: театр және арт-студиялар, сахналық костюмдер тігетін косплей студиясы, коворкинг орталығы мен бүлдіршіндерге арналған ойын бөлмесі.

Ашылу салтанатына қатысқан «Қазақстан халқына» қорының басқарма төрағасы Ләззат Шыңғысбаева биыл еліміздің 17 өңірінде барлығы 34 аудандық және ауылдық мәдениет үйі жаңартылатынын атап өтті. ШҚО-да бұл бағдарламаға Үлкен Нарыннан бөлек, Зайсан ауданындағы Сарытерек ауылының мәдениет үйі де енген.

Жалпы, қор құрылған 2022 жылдан бері Шығыс Қазақстан облысында құны 11 миллиард теңгеге жуық әлеуметтік жобаларды іске асырған. Оның ішінде Үлкен Нарын ауданының төрт мектебіне 101 миллион теңгеге физика, химия және биология пәндерінің зертханалық жабдықтары жеткізілсе, Өскемендегі онкологиялық орталыққа 2,4 миллиард теңгеге сәулелік емдеу аппараты орнатылған.