Шығыс Қазақстанда Мемлекет басшысының тапсырмасы бойынша сирек жер металдары өндірісіне серпін беретін ауқымды бастама қолға алынды

Шығыс Қазақстан облысында стратегиялық мәні жоғары сирек кездесетін жер металдары мен бағалы пайдалы қазбаларды өндірудің, сондай-ақ оларды терең өңдеудің жаңа дәуірін ашатын Жобалық кеңсе ресми түрде құрылып, оның жанынан заманауи ғылыми-техникалық орталық ұйымдастырылып жатыр. Өңірдегі осы маңызды саланы жүйелі түрде өркендетіп, барлық бағыттағы күш-жігерді бір арнаға тоғыстыруға арналған арнайы жиынға аймақ басшысы Нұрымбет Сақтағанов қатысты деп хабарлайды Шығыс Қазақстан облысының әкімдігі баспасөз қызметі.

Жиын барысында өңір басшысы Мемлекет басшысы Қасым-Жомарт Тоқаевтың жаңа индустриялық саясаттағы басымдықтарына тоқталып, сирек жер металдарын кешенді игеру, геологиялық барлау ауқымын кеңейту, озық технологияларды тарту және шикізатты тек сыртқа тасымалдамай, ел ішінде терең өңдеу қажеттігін еске салды. Тарихи тұрғыдан еліміздің негізгі тау-кен, металлургия және геология тірегі болып табылатын Шығыс Қазақстанның әлеуеті бұл бағытта өте жоғары. Сол себепті геологиялық ізденісті, отандық ғылымды, өндірісті, технология мен инвестицияны біртұтас жүйеге ұштастыратын нақты жұмыс тетігін қалыптастыру аса маңызды.

Жаңадан құрылған Жобалық кеңсе жалаң статистика жүргізумен шектелмей, болашағы бар жобаларды алғашқы геологиялық барлаудан бастап зертханалық сынақтар, технологиялық шешімдер, инвестор тарту және өнеркәсіптік деңгейде игеруге дейінгі барлық кезеңдерде жан-жақты сүйемелдейді. Айта кетерлігі, бұл кеңсе мемлекеттік мекемелердің өкілеттіктерін қайталамайды. Лицензиялау, мемлекеттік геологиялық бақылау, сараптама және өзге де рұқсат ету функциялары заңнамаға сәйкес құзырлы мемлекеттік органдардың қарамағында қалады. Ал кеңсенің басты міндеті - ведомствоаралық жедел үйлестіруді қамтамасыз ету, аналитикалық материалдарды әзірлеу және нақты жобалардың іске асуын жеделдету.

Бұл жауапты бағыттағы Жобалық кеңсенің жұмысына басшылық ету міндеті тау-кен өнеркәсібі мен қатты пайдалы қазбалар саласында мол тәжірибесі бар облыс әкімінің кеңесшісі Нұрбол Нұрғалиевке жүктелді.

Сонымен қатар аймақтың ғылыми әлеуетін нақты өндірістік қажеттіліктермен ұштастыру үшін Д.Серікбаев атындағы Шығыс Қазақстан техникалық университетінің (ШҚТУ) базасында ғылыми-техникалық орталық құрылады. Бұл орталық Жобалық кеңсенің басты ғылыми-технологиялық платформасына айналып, университет базасындағы заманауи зертханалар мен халықаралық байланыстарды тиімді пайдалануға мүмкіндік береді. Орталық аясында гранттық қаржыландыру өтінімдерін дайындау, қолданбалы зерттеулер жүргізу, жаңа технологияларды сынақтан өткізу және салаға қажетті кадрларды даярлау жұмыстары қолға алынады.

Аймақ басшысы Нұрымбет Сақтағанов бейінді басқармалардың бұл жұмысқа белсенді атсалысуы қажеттігін атап өтіп, басты көрсеткіш қағазбастылық емес, нақты геологиялық деректер, тиімді технологиялық шешімдер, тартылған инвестициялар мен ел ішінде шикізатты терең өңдеуге жол ашатын жобалар болуы тиістігін қадап айтты. Кеңсенің жұмысы апта сайынғы кеңестерде пысықталып, ай сайын облыс әкімінің бірінші орынбасарына, ал тоқсан сайын облыс әкімінің өзіне есеп беріліп отырады.