«Атадан Мирас» қоры қолға алған «Саналы Ұрпақ» жобасы жастарға қандай мүмкіндік берді

Қазан айының соңы жастар арасында нағыз мерекелік көңіл күйге ұласты. 31 қазан күні «Атадан Мирас» қоғамдық қорының «Саналы Ұрпақ» жобасы аясында 10-11 сынып оқушыларына арналған «Welcome Party» кеші тартысты сәттерге, қуаныш пен күлкіге толы ерекше форматта өтті. Бұл күн жас өрендер үшін жай ғана кеш емес, үлкен өмірлік мақсаттарға бастайтын жаңа белестің кілті болды.

Жаңа орта, жаңа мүмкіндіктер және тосынсыйлар

Жиын барысында жас талапкерлер жай ғана танысып қоймай, өздерінің тапқырлығы мен командалық жұмысқа деген қабілеттерін көрсетті. Түрлі интерактивті сайыстар мен қызықты тапсырмалар залға жиылғандардың назарын бірден өзіне аударды. Ал белсенділік танытып, ерекше көзге түскен оқушыларға арнайы сыйлықтар табысталып, кештің көркін қыздыра түсті.

«Біздің мақсатымыз – тек білім беру ғана емес, саналы, алға ұмтылатын жастардың басын біріктіріп, олардың жарқын болашағына жол ашу», – дейді ұйымдастырушылар.

Бұл оқушылар үшін жаңа тәжірибелер мен үлкен жетістіктерге толы жемісті кезең басталғанын олардың көздеріндегі от пен шексіз шабыты айқын көрсетті.