Астанада 15 ЖОО студенттері бағын сынаған театрландырылған байқау өтті

Елордада жастар арасында заңдылықты, құқықтық тәртіпті және ұлттық құндылықтарды насихаттауға бағытталған «Студенттік қалқан-2026» ауқымды әлеуметтік-мәдини жобасы қорытындыланды. Астана қаласы Жастар саясаты мәселелері басқармасының қолдауымен ұйымдастырылған бұл шараға елорданың 15-ке жуық жоғары оқу орнынан жиналған белсенді де өнерлі студенттер қатысып, өздері дайындаған театрландырылған қойылымдарын көрермендер мен қазылар алқасының назарына ұсынды.

Аталған іс-шараның салтанатты ашылуында Астана қаласы Жастар саясаты мәселелері басқармасының басшысы Самат Ибраев сөз сөйлеп, қатысушыларға сәттілік тіледі және бастаманың қоғамдық-әлеуметтік маңызына кеңінен тоқталды. Өз сөзінде ол елорда әкімдігі тарапынан жастарды, әсіресе студенттік қауымды қолдау бағытында жүйелі жұмыстар жүргізіліп жатқанын атап өтті.

«Астана қаласының әкімдігі жастарға, әсіресе студенттерге әрдайым ерекше көңіл бөледі. Биыл елордада алғаш рет осындай ауқымды жобаны ұйымдастырып отырмыз. «Студенттік қалқан», менің ойымша, жастар үшін өте пайдалы, өзекті әрі маңызды бастама болмақ. Екіншіден, «Студенттік қалқан» - «Заң мен тәртіп» қағидатын насихаттайтын, құқық бұзушылықтың алдын алуға бағытталған жоба ғана емес. Бұл - шығармашылықтың, достық пен бірліктің алаңы», – деп атап өтті Самат Ибраев.

Жобаның негізгі мақсаты – өскелең ұрпақты жат ағымдар мен теріс идеологиялардың ықпалынан қорғау, қоғамда адами құндылықтар мен құқықтық мәдениетті дәріптеу болып табылады. Сахналық сайыс барысында студенттер өздерінің актерлік шеберліктерін көрсете отырып, теріс діни ағымдардың адам өмірі мен қоғамға тигізетін зардаптарын терең ашып берді. Сонымен қатар қойылымдарда ұлттық тәрбие, дәстүрлі салт-сана, отбасылық құндылықтардың рөлі және Қазақстанның зайырлы мемлекет ретіндегі берік ұстанымдары кеңінен көрініс тапты.

Байқауға қатысушылардың өнерін теология, мәдениет және медиа саласының беделді мамандарынан құралған сарапшылар алқасы сарапқа салды. Қазылар құрамында QAZAQ Inclusive Theatre көркемдік жетекшісі, халықаралық байқаулардың лауреаты Марина Тәңірберген, театртанушы әрі драматург Бахтияр Тұрсын, документалист, «Alashorda.kz» ақпараттық агенттігінің бас редакторы Серік Жолдасбай, Астана қаласы Діндерді зерттеу орталығының менеджері Али Сейдулла және танымал теолог Серікжан Еншібайұлы болды.

Өнер мен мағына тоғысқан тартысты доданың қорытындысы бойынша жүлделі орындар төмендегідей бөлінді:

·       I орын – Л.Н. Гумилев атындағы Еуразия ұлттық университетінің студенттер ұжымына бұйырды;

·       II орын – Амангелді Құсайынов атындағы Еуразия гуманитарлық институтының өнерпаздарына берілді;

·       III орын – Күләш Байсейітова атындағы Қазақ ұлттық өнер университетінің студенттері иеленді.

Театрландырылған қойылымдардан бөлек, жоба аясында студенттік ұжымдар әзірлеген арнайы әлеуметтік бейнероликтердің де таныстырылымы өтті. Ұйымдастырушылардың айтуынша, бейнероликтер сайысының жеңімпаздары әлеуметтік желілердегі қаралым мен белсенділік көрсеткіштері бойынша кейінірек анықталатын болады.

Ауқымды шараның соңы мерекелік концерттік бағдарламаға ұласып, онда танымал «JASSTARS» тобы өнер көрсетіп, елордалық жастарға көтеріңкі көңіл-күй мен өз қолдауын білдірді.